الحاصل شنو ؟!

0
7

———-

مناظير السبت _ زهير السراج

 الحاصل شنو ؟!

* من حق اى مواطن ان يتظاهر بشكل سلمى إحتجاجاعلى اى قرار او اىشئ آخر، ولكن التخريب وتعطيل مصالح الناس جريمة يعاقب عليها القانون، ويجب على الشرطة ان تشوف شغلها وبأقصى ما يسمح لها به القانون ضد المخربين والمجرمين، ومافى زول حيلومها!

* من المؤسف ان يُستغل اسم نادى (الهلال) العريق عبر قناة الهلال بواسطة الكيزان وعملائهم واذنابهم مثل المدعو (فضيل) وبعض المهرجين والارجوزاتوالماجورين، واستغلال الدين الحنيف لبث معلومات خاطئة ومغلوطة عن حقوق الانسان والمرأة، وتأليب الشعب السوداني ونشر السموم ضد الدولة المدنية، لخدمة اهداف الكيزان وتجار الدين.

* دكتور (ضيو مطوك) مقرر لجنة الوساطة لمفاوضات السلام: “وجود مقاتلي الحركات المسلحة بعتادهم العسكري في الخرطوم خرق لاتفاق جوبا”.

* في كلام كتير بتقالفي الوسائط عن منتجات زراعية انتاجها حكر على السودان زى السمسم والذرة والكركدى والفول السودانى (والسودانىدى بالمناسبة تسمية عربية فقط) والمنجة والموالح … الخ، وده كلام ما صاح. السودان لا يساوي اي ثقل في انتاج هذه المحاصيل بالنسبة لدول كثيرة جدا في اسيا وامريكا اللاتينية وافريقيا من حيث الكمية والجودة. اصحوا من الوهم ده يا عالم عشان تعرفوا انتو واقفين وين وتخططوا وتشتغلوا صاح وما تغرقوا اكتر في والاوهام !

*لو كنا ننتج قمحا وقطنا وعلماء (عُشر) ما ننتج من اشباه غنايينوغناياتوقونات وسياسيين، لكنا اليوم فى مكان آخر!

* يا اخوانا السخانة الشديدة دى سببها انحنا. لازم اي زول يعرف انو السودان عرضة للتصحر الكامل في خلال خمسين عاما لو لم يجتهد الجميع في منع تدمير القطاع النباتي واعادة تأهيل الغابات وتخضير البلد. لازم تعرفوا انو السخانة الحالية هي المناظر فقط للفيلم الجايى بعنوان … (كان هنا بلد اسمه السودان). كل ابحاث التغير المناخي بتأكد انو السودان وافريقيا بين المدارين هي المناطق الاكثر تأثرا بالتغيير المناخىولن تصلح للعيش فى المستقبل لو لم يهتم الناس بالقطاع النباتي وتأهيله وتطويره. الحاضر يكلم الغايب !!

* الناس البيسخروا من بيع البطيخ بالشقة في الخرطوم، عادي جدا في كتير من دول العالم حتى المتقدم البطيخ بتباع بالشقة، بس بتكون مغلفة في كيس ومختوتة في تلاجات بأبواب زجاجية داخل البقالة … عادي!

* جرت العادة ان يتحدث الرؤساء وكبار المسؤولين بلغة بلادهم اعتزازا بها، كما انها تتيح التعبير بشكل افضل عن افكار المتحدث الامر الذى قد لا تتيحه اللغة الاجنبية، فلماذا تحدث وفد السودان الى مؤتمر باريس باللغة الانجليزية، والمضحك أن الفرنسيين كرهتهم للزول البتكلممعاهمانجليزى، بقولوا عليو غبى!

* الكثير من الجامعات العريقة تبتكر افكارا جميلة لترسيخ العلاقة بخريجيها،بالاضافة الى دعم ميزانيتها المالية، من هذه الافكار خاتم الخريج الذى ينقش عليه شعار الجامعة وتاريخ التخريج واسم الخريج من الداخل ويشتريه الخريجون (اختياريا) بعد التخرج ويكون مصدر فخر للطرفين وذكرى دائمة، فلماذا لا تفعل جامعاتنا نفس الشئ. اقتراح اتقدم به للدكتورة فدوى مديرة جامعة الخرطوم وبقية مدراء الجامعات الاخرى ويمكن ان يشمل المشروع جميع خريجى السنوات الماضية ثم الانتظام فيه كل عام. مشروع يمكن ان يحقق دخلا كبيرا جدا لجامعة الخرطوم والجامعات الاخرى فى ظرف وجيز جدا، ويمكن ان يباع الخاتم للخريجين المغتربين والمهاجرين بسعر معقول بالعملة الصعبة لدعم جامعتهم التى علمتهم وردا لجميلها عليهم.

* الذين يراهنون على قيام المجلس التشريعي والمحكمة الدستورية لتصحيح الاوضاع واهمون، لانهما سيعبِّران بالتأكيد عن رغبة الحكام .. اكيد حيجيبوا ناسهم!

* ما عارف مرات بجينى احساس انو الناس لمن يتكلموا عن المعاناة ما بيقولوا الحقيقة .. اسعار الوقود تزيد تلقى الطرمباتمليانة والناس شغالة تفويل .. يجى العيد تلقاهم كلهم ضابحين . تمر بمحلات السمك تلقاها مليانةومدفقةوالركشاتبرة ما تديك الدرب. الاسواق في كل الاوقات زحمة ما عادية زى يوم الوقفة. البقالات مستفة. سألت بتاع بقالة فىحى عادى جدا قلت ليو تأثير ارتفاع الاسعار عليكم شنو .. قال لى بنبيع اكتر من الاول. البلد كلها مليانة عمارات وعربات جديدة. الحاصل شنو يا اخوانا ؟

ترك الرد

من فضلك ادخل تعليقك
من فضلك ادخل اسمك هنا