صحيفة كورة سودانية الإلكترونية

خيبة الامل راكبة جمل

89

في السلك

بابكر سلك
*نحن شعب قوي التحمل زي الجمل
*وبرضنا مابننسي الزول الازانا برضو زي الجمل
*حتي في اغنيات بناتنا وكنداكاتنا يوجد هذا المعني
*الله يأزي الازانا وين البلال ماجانا
*ولعله زمن البلال قد حان
*فاضحي الحل في البل ليس سواه
*لذا تجدنا ننتظر البلال علي احر من الجمر
*ايها الناس
*نحن قوم تحملنا قوي
*برضك زي الجمل
*فالظروف التي عاشها الشعب السوداني قبل الثورة
*واثناء الثورة
*وبعد تحقق جزء من اهداف الثورة
*ظروف الجمل زاتو مابتحملها
*وكانت الثورة كل الامل
*وجاءت خيبة الامل راكبة جمل
*تقدل فينا الهوينه لان الوجي كان وحل
*جلبق في طين الرصاص العشوائي
*وبرطع في خبوب فض الاعتصام الغريب
*ثم غسل جمل خيبة الامل كرعينو الطوال ديل في النيل
*النيل الشاهد علي الخمج والخبوب
*النيل الشاف كل الحصل
*النيل السمع صرخات حواء السودانية تشق عنان السماء
*نعم هو نفسه النيل الذي احتضن الاجساد الطاهرة
*نعم هو نفسه النيل الذي يغتسل فيه الآن جمل خيبة الامل
*ايها البلال
*شاهد الاتهام الاول هو النيل
*وقرائن الادانة كثيرة
*اولها خضاب سكاكات جمل خيبة الامل بالطين والدم وبقايا رصاص
*شاهد الاتهام الثاني كان حاضرا وقت التحمل بالشهادة خلف الاسوار الرمادية حتي اضحي لونه رمادي فيهو برقعة
*تلك البرقعة مرات توحي لنا بانها بوارق امل
*ومرات نظنها بردعة تضعها خيبة الامل علي الجمل لما تجي تركب الجمل
*اما شاهد الاتهام الثالث وهو الاهم
*نتوقع الطعن في شهادته بادعاء انه كان فاقد التمييز وقت التحمل بالشهادة
*اسمه كولمبيا
*قد يكون قد كان سكرانا
*واكنه واعي بماحدث
*هو ماحدث خلي سكرة في الراس؟؟؟؟
*ماحدث خلي السكران يركع
*والمسطول يبرطع
*والعاقل يطقع
*والمجنون يفلسع
*والمتوضي يجغم بنهم
*ماحدث حدث
*لان خيبة الامل راكبة جمل
*ايها الناس
*بأي حال عاد العيد هذه المرة؟؟..
*طوطحانية الحلة تبكي
*بالونات الطبالي لاتبالي
*وضحكات الاطفال تلاشت وسط صراخ الكنداكات
*والنيل يحتضن الشباب
*وكأن مهر الثورة كان القاء عريس للنيل علي طريقة الفراعنة حينما كانوا يقدمون اجمل فتياتهم عروسا للنيل قربانا له
*هل انا يابحر منك؟؟؟؟
*آآآ؟؟؟
*لست ادري
*وانت ايضا لست تدري
*إذن من يدري؟؟؟
*ايها الناس
*شداد لو داير يلعب الدوري
*الا يلعبوا بدون جمهور
*وبدون حكام
*بالذات بدون حكام دي
*لانو في البلد دي جهة بتبوظ الحاجات غير الحكام مافي
*العبها ياشداد بدون حكام
*يمكن خيبة الامل تنزل من الجمل وتفوت تخلينا
*ايها الناس
*مجلس المريخ يعتزم الاستقالة
*اريت كل المجالس تبطل ثقالة وتمارس الاستقالة
*بالذات المجلس ال….البلدي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*التلفزيون القومي لسه بمرض فينا
*التلفزيون ده ماعارف الحاصل ولاشنو يا والينا
*ماعندو شغله غير يمرض فينا
*خليهم الانعم عليهم ربك وبقوا من السامعينا
*حتي الطرش قالوا بمرض فينا
*لانو شاشتو ساي مافيها شئ يجذبنا وامامها نقعد يخلينا
سلك كهربا
ننساك كيف والكلب قال التلفزيون ده رجعوهوا لوكنده زي ماكان احسن
والي لقاء
سلك

قد يعجبك أيضا
اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد